చదువు కేవలం ఉద్యోగం సంపాదించడానికే కాదు, సమాజానికి సేవ చేయడానికి కూడా అనే గొప్ప ఆశయంతో ముందుకు సాగుతున్నారు ధర్మవరం మండలం, చిగిచెర్ల గ్రామానికి చెందిన యువ ఇంజినీర్ కతే పవన్ కుమార్. B.Tech (ఎలక్ట్రికల్ అండ్ ఎలక్ట్రానిక్స్) పూర్తి చేసి, ఐటీ రంగంలో ఉద్యోగ ప్రయత్నాలు చేస్తూనే, తన సమయాన్ని, శక్తిని దివ్యాంగుల సేవకు అంకితం చేస్తూ నేటి యువతకు ఆదర్శంగా నిలుస్తున్నారు.
దివ్యాంగుల సేవలో కార్యదర్శిగా..
పవన్ కుమార్, దివ్యాంగుల సంక్షేమం కోసం పనిచేస్తున్న అఖిల భారత సేవా సంస్థ “సక్షమ్” (సమదృష్టి, క్షమత వికాసం మరియు అనుసంధాన్ మండలి)కు శ్రీ సత్యసాయి జిల్లా కార్యదర్శిగా బాధ్యతలు నిర్వర్తిస్తున్నారు. ఈ సంస్థ ద్వారా ఆయన దివ్యాంగులకు అవసరమైన UDID కార్డులు, వినికిడి యంత్రాలు, వీల్చెయర్లు, కంటి శస్త్రచికిత్సలు, బ్రెయిలీ పుస్తకాలు వంటి ఎన్నో సేవలను అందిస్తూ వారి జీవితాల్లో వెలుగులు నింపుతున్నారు. అంతేకాకుండా, ‘దీన్ దయాళ్ శ్రవణ్ ఫౌండేషన్’కు రాయలసీమ జిల్లాల కన్వీనర్గా కూడా సేవలందిస్తున్నారు.
అందుకున్న పురస్కారాలు, సత్కారాలు
ఆయన నిస్వార్థ సేవకు గుర్తింపుగా ఎన్నో పురస్కారాలు వరించాయి. 2022లో ‘సక్షమ్ సేవా పురస్కారం’ అందుకున్నారు. 2025లో ప్రయాగరాజ్లో జరిగిన మహా కుంభమేళాలో ‘నేత్ర కుంభ్’ కార్యక్రమంలో పాల్గొని గౌరవం పొందారు. ధర్మావరంలో జరిగిన వినికిడి యంత్రాల పంపిణీ శిబిరంలో రాష్ట్ర ఆరోగ్యశాఖ మంత్రి శ్రీ సత్యకుమార్ యాదవ్ చేతుల మీదుగా సత్కారం అందుకున్నారు. అనేక రక్తదాన శిబిరాల్లో పాల్గొని ప్రశంసా పత్రాలు పొందారు.
ఆదర్శం, సందేశం
శ్రీ సత్యసాయి బాబాను ఆదర్శంగా తీసుకుని సేవ చేస్తున్న పవన్ కుమార్, యువతకు ఒక స్పష్టమైన సందేశం ఇస్తున్నారు.
“Love All, Serve All (అందరినీ ప్రేమించు, అందరికీ సేవ చేయి)”
“End Of The Education is Character (చదువుకు పరమార్థం శీలం)”
“సమాజ సేవలోనే నిజమైన ఆనందం ఉంది, అది మన వ్యక్తిత్వాన్ని నిర్మిస్తుంది,” అని ఆయన తన అనుభవంతో చెబుతారు.
