తెలుగు రాష్ట్రాలను ఈ మధ్యకాలంలో భయపెడుతున్న భూతాలు.. ఆన్లైన్ బెట్టింగ్, డ్రగ్స్, గంజాయి వాడకం.. వీటి నివారణకు ప్రభుత్వాలు ఎన్ని చర్యలు చేపడుతున్నా ప్రయోజనాలు ఎక్కువగా కనిపించడం లేదు. ఈజీగా డబ్బు సంపాదించాలనే ఆశతో కొంతమంది ఆన్లైన్ బెట్టింగ్లకు బానిసలుగా మారి జీవితాలను నాశనం చేసుకుంటూ ఉంటే.. మరికొంత మంది యువత.. నిషా కోసం గంజాయి, డ్రగ్స్ వంటి వాటిని ఆశ్రయిస్తూ బంగరు భవితను పాడుచేసుకుంటున్నారు. ఆంధ్రప్రదేశ్ ప్రభుత్వం డ్రగ్స్, గంజాయి కట్టడికి ఎన్ని చర్యలు చేపడుతున్నా.. వీటి మత్తుకు అలవాటు పడిన వారు మాత్రం నిషా కోసం కొత్త కొత్త మార్గాలను కనిపెడుతున్నారు.
అలాంటి ఘటనే బాపట్ల జిల్లాలో వెలుగు చూసింది.
బాపట్లలోని కొంతమంది యువకులు మత్తు కోసం పెయిన్ కిల్లర్ మందులను వాడుతున్న వైనం వెలుగు చూసింది. నిషా కోసం కొంత మంది యువత పెయిన్ కిల్లర్ మందులను ఇంజెక్షన్ రూపంలో తీసుకుంటున్న ఘటన.. స్థానికంగా కలకలం రేపింది. జమ్ములపాలెం ఓవర్ బ్రిడ్జి కింద కొంతమంది యువత ఇలాంటి ఇంజెక్షన్లు తీసుకుంటున్నారనే సమాచారం పోలీసులకు అందింది. దీంతో పోలీసులు అక్కడకు చేరుకున్నారు. మత్తు మందు ఇంజెక్షన్లు తీసుకుంటున్న ముగ్గురు యువకులను గుర్తించారు. వెంటనే వారిని అదుపులోకి తీసుకున్న పోలీసులు.. ఎవరి ద్వారా ఈ ఇంజెక్షన్లు వారికి చేరాయనే దానిపై ఆరా తీస్తున్నారు. ఇలాంటి ఇంజెక్షన్లను ఇంకా ఎంతమంది వాడుతున్నారనే దానిపైనా వివరాలు ఆరా తీస్తున్నారు.
మరోవైపు ఇటీవలే స్టువర్టుపురంలోనూ ఇలాంటి మత్తు మందుల వ్యవహారం వెలుగుచూసింది. మత్తు కలిగించే మాత్రల విక్రయాలు జరుగుతున్నాయని పోలీసులకు సమాచారం అందింది. దీంతో పోలీసులు తనిఖీలు నిర్వహించారు. ఈ తనిఖీలలో ఓ మహిళ వద్ద వందల సంఖ్యలో ఉన్న మత్తు ట్యాబ్లెట్లను స్వాధీనం చేసుకున్నారు. ఈ ఘటన స్థానికంగా కలకలం రేపింది. విద్యార్థులే టార్గెట్గా ఈ దందా జరుగుతున్నట్లు పోలీసులు గుర్తించారు. ప్రభుత్వం గంజాయి సాగు, రవాణాపై కఠిన చర్యలు తీసుకుంటూ, ఉక్కుపాదం మోపుతూ ఉండటంతో వీటికి బానిసలైనవారు ఇలాంటి మత్తు మందులవైపు మళ్లుతున్నట్లు పోలీసులు భావిస్తున్నారు.
