ఛాంపియన్స్ ట్రోఫీ గెలిచిన టీమిండియాకు బీసీసీఐ భారీ రివార్డ్ ప్రకటించింది. ఐసీసీ నగదుతో పాటు బీసీసీఐ కూడా భారీ మొత్తంలో క్యాష్ రివార్డు ఇచ్చింది. ఛాంపియన్స్ ట్రోఫీ 2025 విజేతగా నిలిచిన టీమిండియా స్క్వాడ్ మొత్తానికి రూ.58 కోట్లు ఇస్తున్నట్లు బీసీసీఐ ప్రకటించింది. రోహిత్ శర్మ కెప్టెన్సీలో టీమిండియా ఓటమి ఎరుగకుండా విజేతగా నిలిచింది.
పాకిస్తాన్ వేదికగా ప్రారంభమైన ఛాంపియన్స్ ట్రోఫీ‌లో టీమిండియా విజయకేతనం ఎగురవేసింది. పాకిస్తాన్-భారత్ మధ్య సత్సంబంధాలు లేకపోవడంతో టీమిండియా మ్యాచ్‌లు మాత్రం దుబాయ్ వేదికగా సాగాయి. గ్రూప్ లీగ్‌లో బంగ్లాదేశ్, పాకిస్తాన్, న్యూజిలాండ్ మీద గెలిచిన భారత్ సెమీ ఫైనల్‌లో ఆస్ట్రేలియాపై విజయం సాధించింది. ఫైనల్స్‌లో న్యూజిలాండ్ మీద గెలిచిన భారత్ మూడోసారి ఛాంపియన్స్‌గా నిలిచింది.
ఛాంపియన్స్‌గా నిలిచిన టీమిండియాకు బీసీసీఐ ప్రత్యేకంగా రూ.58 కోట్ల నగదు అందజేయడం విశేషం. ఈ నగదు మొత్తం కేవలం 15 మంది టీమిండియా ప్లేయర్లే కాకుండా సపోర్టింగ్ స్టాఫ్, కోచింగ్ స్టాఫ్ అందరికీ ఇవ్వనున్నారు. సెలక్షన్ కమిటీ హెడ్ అజిత్ అగార్కర్‌తో పాటు హెడ్ కోచ్ గౌతమ్ గంభీర్‌కి కూడా ఈ నగదు రివార్డు అందించనున్నారు.
ఛాంపియన్స్ ట్రోఫీ 2025 ట్రోఫీ అందుకున్న తర్వాత విజేతలకు ఐసీసీ కూడా నగదు బహుమతి అందించింది. ఛాంపియన్స్ ట్రోఫీ 2025 కోసం మొత్తంగా రూ.60 కోట్ల ప్రైజ్‌మనీని ఐసీసీ కేటాయించింది. విజేతగా నిలిచిన టీమిండియాకు దాదాపు రూ.19.48 కోట్లు రాగా, రన్నరప్‌గా నిలిచిన న్యూజిలాండ్ జట్టుకు రూ.9.72 కోట్లు అందజేశారు. సెమీ ఫైనల్స్‌లో ఓడిన ఆస్ట్రేలియా, సౌతాఫ్రికా జట్లకు చెరో రూ.4.86 కోట్లు అందుకున్నాయి.
గ్రూప్ దశలో ఇంటిదారి పట్టిన జట్లకు కూడా వారి వారి పర్ఫార్మెన్స్ ఆధారంగా నగదు అందజేశారు. ఐదు, ఆరు స్థానాల్లో నిలిచిన అప్ఘనిస్తాన్, బంగ్లాదేశ్ జట్లకు రూ.3.04 కోట్లు, ఏడు, ఎనిమిది స్థానాల్లో నిలిచిన పాకిస్తాన్, ఇంగ్లండ్ జట్లకు రూ.1.22 కోట్లు అందజేశారు. గ్రూప్ స్టేజ్‌లో ప్రతి మ్యాచ్‌కు రూ.29 లక్షల చొప్పున నగదును ఐసీసీ అందజేసింది.
