Mayor Arrested in Drunk And Drive Case: బాధ్యతాయుతమైన పదవిలో ఉన్న ఓ మేయర్.. విచక్షణా రహితంగా వ్యవహరించారు. ముఖ్యంగా తన రెండేళ్ల వయసు ఉన్న బిడ్డను డే కేర్ నుంచి తీసుకు వచ్చేందుకు వెళ్లిన ఈమె కారులోనే మద్యం సేవించారు. చిన్నారిని తీసుకు వస్తుండగా కూడా అదే పనిగా తాగుతూ.. మద్యం మత్తులోనే కారును నడిపారు. విషయం గుర్తించిన వాహన దారులు దీన్ని వీడియోగా తీసి సోషల్ మీడియాలో పెట్టగా వైరల్ అయింది. అయితే ఈ వీడియోను చూసిన పోలీసు అధికారులు ఆమెపై కేసు నమోదు చేసి అరెస్ట్ చేశారు. ఆ పూర్తి వివరాలు మీకోసం.
అమెరికాలోని న్యూజెర్సీ మేయర్ గినా లాప్లాసా తన రెండేళ్ల కుమారుడిని డే కేర్ నుంచి తీసుకు వచ్చేందుకు కారులో వెళ్లారు. అయితే వెళ్లేటప్పుడే ఆమె ఫుల్లుగా మద్యం సేవించారు. చిన్నారిని తీసుకుని వస్తుండగా.. కూడా మద్యం మత్తులోనే కారు నడిపారు. అయితే డ్రైవింగ్ చేస్తుండగా.. మత్తు ఎక్కువ అయిన మేయర్ ఓ వాహనానికి ఢీకొట్ట బోయారు. అయితే అదృష్ట వశాత్తు దాన్నుంచి బయట పడ్డారు. ఇంత నిర్లక్ష్యంగా కారు నడపగా.. అక్కడే ఉన్న కొందరు దీన్ని వీడియోగా తీశారు. ముఖ్యంగా అప్పుడు మేయర్ పక్కన రెండేళ్ల చిన్నారి కూడా ఉండగా.. క్షణాల్లోనే వీడియో వైరల్‌గా మారింది.
వైరల్ వీడియో చూసి నేరుగా మేయర్‌ను ఫాలో అయిన పోలీసులు
ఇలా ఈ వీడియో కాస్తా పోలీసుల కంట పడగా.. వెంటనే మేయర్ వెళ్తున్న కారును అనుసరించారు. అలా ఆమె ఇంటికి చేరుకోగానే.. వెళ్లి తనిఖీ చేశారు. అయితే కారులో మద్యం సీసా దొరకగా.. ఆమెకు ఆల్కహాల్ టెస్టు కూడా చేశారు. పాజిటివ్ రావడంతో వెంటనే ఆమెను అదుపులోకి తీసుకున్నారు. దీంతో సదరు మేయర్‌పై పెద్ద ఎత్తున విమర్శలు వచ్చాయి. ఆమెకు పిల్లాడిని దూరంగా ఉంచమంటూ అనేక మంది కామెంట్లు కూడా చేశారు.
మేయర్ గినా లాప్లాసా భర్త రియాక్షన్ ఏంటంటే..?
అయితే దీనిపై ఆమె భర్త స్పందించారు. లక్షలాది మంది అమెరికన్లు మద్యం వ్యసనంతో పోరాడుతున్నారని చెప్పుకొచ్చారు. వారికి ఎలాంటి సాయం అందడం లేదని చెప్పారు. ఈ వ్యసనాన్ని వదిలించుకోవడానికి మేయర్ గినా చాలా కష్ట పడిందని.. ఇప్పుడు ఆమెకు అవసరమైన వైద్య సహాయం అందుతుందని వివరించారు. దయచేసి విమర్శలు ఆపండి అంటూనే.. ఆమె ఇతరులకు సాయం చేయాలనే అభిరుచిని గుర్తించండి అంటూ సోషల్ మీడియా వేదికగా పోస్ట్ పెట్టారు.
