మాజీ భారత క్రికెటర్ అంబటి రాయుడు తాజాగా చేసిన ట్వీట్ సోషల్ మీడియాలో పెద్ద దుమారాన్ని రేపింది. “గొప్ప వ్యక్తిగత ప్రదర్శనలు ట్రోఫీలను గెలిపించవు, జట్టు విజయమే ముఖ్యం” అంటూ చేసిన వ్యాఖ్యలు, రాయల్ ఛాలెంజర్స్ బెంగళూరు (RCB) జట్టుపై పరోక్ష విమర్శగా భావించబడ్డాయి. దీంతో విరాట్ కోహ్లీ అభిమానులు ట్విట్టర్‌లో రాయుడిపై తీవ్ర స్థాయిలో ట్రోలింగ్ ప్రారంభించారు.
ఈ ట్రోలింగ్‌కు తాను భయపడనని చాటిచెప్పిన రాయుడు, మరొక ట్వీట్ ద్వారా ధీటుగా స్పందించాడు. “నేను ఎప్పటికీ థాలా (ధోనీ) అభిమానినే. మీ పబ్లిసిటీ డ్రామాలకు డబ్బు ఖర్చు చేయడం మానండి, ఆ డబ్బును అవసరమున్నవారికి దానం చేయండి,” అంటూ ఘాటు వ్యాఖ్యలు చేశాడు. దీంతో రాయుడు–RCB అభిమానుల మధ్య మాటల యుద్ధం ఇంకా ముదిరింది.
సోషల్ మీడియాలో ఈ సంఘటన పెద్ద చర్చకు దారి తీసింది. కొంతమంది రాయుడి వ్యాఖ్యలు నిజాయితీగా ఉన్నాయంటూ మద్దతు పలుకుతుంటే, మరికొంతమంది ఆయనపై తీవ్ర విమర్శలు గుప్పిస్తున్నారు. మొత్తానికి, ఒక ట్వీట్‌తో రాయుడు మరోసారి వార్తల్లోకి వచ్చారు… కానీ ఈసారి మ్యాచ్ మైదానంలో కాదు, ట్విట్టర్ యుద్ధంలో!
