ఆన్లైన్ బెట్టింగ్ యాప్ల వ్యవహారం ప్రస్తుతం రెండు తెలుగు రాష్ట్రాల్లో సంచలనం సృష్టిస్తోంది. బెట్టింగ్ యాప్స్ వివాదంలో ముందుగా సోషల్ మీడియా ఇన్ఫ్లూయెన్సర్స్, యూట్యూబర్స్ పేర్లు మాత్రమే వినిపించగా.. ఇప్పుడు ప్రముఖ టాలీవుడ్ సెలబ్రిటీల పేర్లు కూడా తెర మీదకు వచ్చాయి. ఇప్పటికే పలువురు సినీ నటులు, సోషల్ మీడియా ఇన్ఫ్లూయెన్సర్స్పై పోలీసులు కేసు నమోదు చేసి, నోటీసులు జారీ చేసారు. విష్ణు ప్రియ, రీతూ చౌదరి లాంటి కొందరిని విచారించారు. ఇక ఈ కేసులో సీనియర్ నటుడు ప్రకాష్ రాజ్ పేరు కూడా ఉంది. దీనిపై తాజాగా ప్రకాష్ రాజ్ స్పందిస్తూ ఈ మేరకు ఓ వీడియో రిలీజ్ చేసారు.
”నేను ఒక సినిమా షూటింగ్ లో ఉన్నాను. ఆన్లైన్ గేమింగ్ యాప్ కేసుల గురించి, నేను చేసిన బెట్టింగ్ యాప్ యాడ్ గురించి సోషల్ మీడియాలో, కొన్ని మీడియాలలో చర్చ జరుగుతోందని ఇప్పుడే నాకు తెలిసింది. అందరినీ ప్రశ్నించే నేను సమాధానం చెప్పాల్సిన అవసరం ఉంది. నాకు పోలీస్ స్టేషన్ నుంచి ఎలాంటి నోటీసులు, సమన్లు రాలేదు. ఒకవేళ వస్తే నేను వివరణ ఇస్తాను. అది నా రెస్పాన్సిబిలిటీ. నేను ఇచ్చే ఆన్సర్ ఏంటంటే.. 2016 జూన్ లో జంగిల్ రమ్మీ గేమింగ్ యాప్ నా దగ్గరకు వచ్చింది. నేను ఆ యాడ్ లో నటించాను. అది లీగల్ అయినా సరే, కొన్ని నెలల తర్వాత అది సరైంది కాదని తెలుసుకున్నాను. కానీ ఏడాది కాట్రాక్ట్ కుదుర్చుకోవడం వల్ల నేను ఏమీ చేయలేకపోయాను”
”అగ్రిమెంట్ రెన్యూవల్ చేయడానికి వచ్చినప్పుడు నేను కుదరదని చెప్పేసాను. నేను కంటిన్యూ అవ్వలేనని చెప్పాను. ఇది జరిగి 9 ఏళ్లు అయింది. ఇప్పటి వరకూ నేను మళ్లీ ఆన్ లైన్ గ్యాంబ్లింగ్ గేమ్స్ ని ప్రమోట్ చేస్తూ ఎలాంటి యాడ్ చేయలేదు. 2021లో ఆ కంపెనీ యాప్ ని ఇంకో కంపెనీకి అమ్మింది. వాళ్ళు నేను నటించిన యాడ్ ని ఏదో సోషల్ మీడియాలో పెట్టారు. నేను వాళ్ళకి నోటీసులు పంపించాను. కాంట్రాక్టు అయిపోయిన తర్వాత యాడ్ ఉపయోగించడం ఇల్లీగల్ అని, వెంటనే స్టాప్ చేయాలని మెయిల్ పెడితే.. వాళ్ళు ఆపేసారు”
”నేను అందరికీ చెబుతున్నాను.. ఎనిమిదేళ్ల క్రితం నేను ఆ యాడ్ చేసిన మాట నిజమే. కానీ ఆ తర్వాత బెట్టింగ్ యాప్స్ ని ప్రమోట్ చేయకూడదని నిర్ణయం తీసుకున్నాను. గ్యాంబ్లింగ్ కి యువత బాధితులుగా మారొద్దని కోరుతున్నాను. ఎందుకంటే అవి జీవితాలను నాశనం చేస్తాయి. అందుకే అందరూ వాటికీ దూరంగా ఉండాలి. వివరణ ఇవ్వాల్సిన బాధ్యత నాపై ఉంది కాబట్టి, ప్రజలకు ఈ సమాధానం చెబుతున్నాను. 8 ఏళ్ళ క్రితం నేను చేసిన ఒక్క తప్పుని మన్నిస్తారని ఆశిస్తున్నాను” అని ప్రకాష్ రాజ్ చెప్పుకొచ్చారు.
ఆన్లైన్ గేమ్స్పై విజయ్ దేవరకొండ టీమ్ క్లారిటీ..
బెట్టింగ్ యాప్స్ కేసులో యువ హీరో విజయ్ దేవరకొండ పేరు కూడా రావడం, పోలీస్ కేసు ఫైల్ అవ్వడంపై ఆయన టీమ్ స్పందించింది. కేవలం స్కిల్ బేస్డ్ గేమ్స్కు మాత్రమే విజయ్ ప్రమోట్ చేసారని, అది కూడా కంపెనీ చట్ట ప్రకారమే నిర్వహిస్తున్నట్లు వివరణ ఇచ్చారు. రమ్మీ అనేది స్కిల్ బేస్డ్ గేమ్ అని గతంలో సుప్రీం కోర్టు కూడా తెలియజేసింది. ఏ23 అనే కంపెనీతో విజయ్ అగ్రిమెంట్ గతేడాది ముగిసింది. ఇప్పుడు ఆ కంపెనీతో ఎలాంటి సంబంధం లేదు. విజయ్ దేవరకొండ విషయంలో పలు మీడియాల్లో వస్తున్న వార్తల్లో ఎలాంటి నిజం లేదు. నిబంధనలకు విరుద్ధంగా పనిచేస్తున్న ఏ సంస్థకూ ఆయన ప్రచారకర్తగా వ్యవహరించడం లేదు అని టీం క్లారిటీ ఇచ్చింది.
